ՌԴ-ում կբարձրանան ավտոմեքենաների պետական տուրքերը

Ռուսաստանի Պետդումայի բյուջետային կոմիտեն հավանություն է տվել կառավարության ներկայացրած օրինագծին, որով զգալիորեն կբարձրանան ավտոմեքենաների փաստաթղթերի և համարանիշերի ստացման պետական տուրքերը։ Օրինագիծը նախատեսվում է քվեարկության դնել հուլիսի 15-ին։

Մասնավորապես, տրանսպորտային միջոցի տեխնիկական անձնագրի ստացման տուրքը կբարձրանա 800-ից՝ մինչև 1200 ռուբլի, իսկ դրանում փոփոխություն կատարելու տուրքը՝ 350-ից՝ մինչև 525 ռուբլի։ Մեքենայի գրանցման վկայականի համար վճարը թղթային տարբերակի դեպքում կկազմի 1500 ռուբլի, իսկ պլաստիկ՝ 4500 ռուբլի։ Վարորդական իրավունքի վկայականը պլաստիկով կարժենա 4000, իսկ նոր սերնդի տարբերակը՝ 6000 ռուբլի։

Բարձրացվում են նաև միջազգային վարորդական վկայականի (1600-ից՝ 3200 ռուբլի), մեքենայի պետհամարանիշերի և մետաղական կամ թղթային ժամանակավոր համարանիշերի տուրքերը։

Բացի այդ, մինչև 4500 ռուբլի կբարձրանա նաև մեքենայի կառուցվածքում փոփոխություններ կատարելուց հետո անվտանգության պահանջներին համապատասխանության վկայականի արժեքը։

Ըստ փորձագետների՝ փոփոխությունները պայմանավորված են նավթագազային եկամուտների անկումով, ինչը կառավարությանն ուղղել է լրացուցիչ եկամուտների աղբյուրների որոնման։