Գերմանիան պատրաստ է սպանել ռուս զինվորների՝ ՆԱՏՕ-ի վրա հարձակման դեպքում

Գերմանիայի պաշտպանության նախարար Բորիս Պիստորիուսը հայտարարել է, որ գերմանական զորքերը պատրաստ են «սպանել ռուս զինվորների», եթե Ռուսաստանը հարձակում գործի ՆԱՏՕ-ի անդամ երկրների վրա։ Այդ մասին հայտնում է Financial Times-ը՝ մեջբերելով նախարարի խոսքը։

Պիստորիուսն ընդգծել է, որ ուժի ցուցադրումը խաղաղության պահպանման անհրաժեշտ պայման է. «Խաղաղության մասին կարելի է խոսել միայն ուժի դիրքերից», — ասել է նա։ Միևնույն ժամանակ նա հերքել է, թե Գերմանիան սպառնում է՝ շեշտելով, որ պարզապես պատրաստ է ինքնապաշտպանությանը։

Ավելի վաղ Պիստորիուսը հայտնել էր, որ Գերմանիան չի պատրաստվում Ուկրաինային փոխանցել Taurus տեսակի հրթիռներ՝ վկայակոչելով սեփական պաշտպանական պաշարների սահմանափակ լինելը։