Ռուսաստանում արձագանքել են Թրամփի խոսքերին Պուտինի մասին․ «Արժե դատել գործողություններով»

ՌԴ Պետդումայի պատգամավոր Ալեքսեյ Չեպան կոչ է արել չհիմնվել Դոնալդ Թրամփի խոսքերի վրա՝ Վլադիմիր Պուտինի մասին, այլ գնահատել նրա իրական գործողությունները։ «Թրամփը հաճախ է փոխում իր կարծիքը տարբեր հարցերում, այդ պատճառով կարևոր է առաջնորդվել փաստերով, ոչ թե մամուլում տարածված մեկնաբանություններով», — ասել է Չեպան Лента.ру-ին։

Նրա խոսքով՝ ներկայում շատ կեղծ տեղեկատվություն է շրջանառվում, իսկ փաստերն այն են, որ Ուկրաինայում մարտերը շարունակվում են և, ըստ Ռուսաստանի դիրքորոշման, Ուկրաինան կրում է լուրջ կորուստներ։ Նա ընդգծել է, որ ԶԼՄ-ների մեկնաբանությունները հաճախ չեն արտացոլում Թրամփի իրական դիրքորոշումը։

Ավելի վաղ Axios-ը հաղորդել էր, որ Թրամփը, հանդիպելով Ֆրանսիայի նախագահ Մակրոնին, հայտնել է, թե Պուտինը ցանկանում է «յուրացնել ամեն ինչ» և կարող է առաջիկա 60 օրում սկսել նոր հարձակումներ Ուկրաինայի ամբողջ տարածքով։