Ինքնաթիռ է կործանվել Լոնդոնի Southend օդանավակայանում

Հուլիսի 13-ին փոքր մասնավոր ինքնաթիռը կործանվել է Լոնդոնի Southend օդանավակայանում՝ թռիչքից ընդամենը մի քանի վայրկյան անց։ Ինքնաթիռը պատկանել է նիդերլանդական Zeusch Aviation ընկերությանը և նախատեսված էր հիվանդների օդային տեղափոխման համար։ Օդանավակայանը փակվել է մինչև հետագա ծանուցում՝ բոլոր թռիչքները չեղարկվել են։

Ըստ բրիտանական լրատվամիջոցների՝ ինքնաթիռը Beechcraft B200 Super King Air տիպի տուրբոպրոպ մոդել էր, 12 մետր երկարությամբ, և այդ օրը արդեն հասցրել էր թռիչքներ իրականացնել Աթենքից Պուլա և հետո դեպի Southend։ Ընկերությունը հաստատել է, որ SUZ1 չվերթը վթարի է ենթարկվել և համագործակցում է քննության մարմինների հետ։

Ականատեսներից մեկը պատմել է, որ ինքնաթիռը թռիչքից 3-4 վայրկյան անց ուժեղորեն թեքվել է ձախ՝ գլխիվայր շրջվել և ուղղակի հարվածել գետնին։ Դեպքի վայրում աշխատում են ոստիկանություն, շտապօգնություն և ավիավթարի հետաքննիչներ։ Զոհերի մասին պաշտոնական տվյալներ առայժմ չկան։