Կամերունի 92-ամյա նախագահը պատրաստվում է մնալ իշխանության մինչև գրեթե 100 տարեկան դառնալը

Կամերունի նախագահ Պոլ Բիան, ով իշխանության է եկել դեռ 1982 թվականին, հայտարարել է, որ առաջադրվելու է հերթական՝ ութերորդ անգամ, հոկտեմբերին նախատեսված նախագահական ընտրություններում։ 92-ամյա առաջնորդն ասում է, որ «շատ գործ կա անելու» և իր որոշումը հիմնված է երկրի 10 շրջաններից և սփյուռքից ստացած «հրավերների» վրա։

Չնայած առողջական վիճակի մասին համառ շշուկներին՝ որոնք պաշտոնական շրջանակները հերքել էին ամիսներ առաջ, Բիան շարունակում է իր իշխանությունը պահել ամուր։ Քննարկումները նրա առողջության շուրջ նույնիսկ արգելվել են Կամերունի ներքին գործերի նախարարության կողմից՝ անվանվելով ազգային անվտանգության հարց։

Քաղաքագետների խոսքով՝ նրան հաղթելը հեշտ չի լինի, քանի որ ընդդիմությունը բաժանված է ավելի քան 300 կուսակցությունների միջև։ Նախկինում կոալիցիա կազմելու փորձերը հայտարարվել էին «ապօրինի», իսկ միջազգային կազմակերպությունները կառավարությանը մեղադրել են մարդու իրավունքների զանգվածային խախտումների՝ ներառյալ խոշտանգումների, անհիմն ձերբակալությունների և ԼԳԲՏ անձանց հալածանքի մեջ, հայտնում է CNN-ը։