Զախարովան ՆԱՏՕ-ի գլխավոր քարտուղարի խոսքերն անհեթեթություն է անվանել

ՆԱՏՕ-ի գլխավոր քարտուղար Մարկ Ռյուտեի Ստամբուլում ռուսական պատվիրակության ղեկավար  Վլադիմիր Մեդինսկու մասին հայտարարությունը «աբրակադաբրա» է։ Այսպես է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան իր Telegram ալիքում արձագանքել դաշինքի ղեկավարի՝ Ռուսաստանի նախագահի օգնականի մասին խոսքերին։

Ռյուտեն նախկինում հայտարարել էր, որ Ռուսաստանի նախագահ Վլադիմիր Պուտինը լուրջ մարդկանց չի ուղարկել Թուրքիա՝ Ուկրաինայի հետ բանակցելու համար։  ՆԱՏՕ-ի գլխավոր քարտուղարի խոսքով՝ ռուս ներկայացուցիչներին գլխավորում էր «ինչ-որ պատմաբան», մինչդեռ Կիևը , Արևմուտքի ճնշման տակ, «լուրջ» պատվիրակություն էր ուղարկել։

«Այս «ինչ-որ պատմաբանը» միջազգային հարաբերությունների մասնագետ, գիտնական և պետական գործիչ Վլադիմիր Ռոստիսլավովիչ Մեդինսկին է», - ընդգծել է Զախարովան։

Միևնույն ժամանակ, Արտաքին գործերի նախարարության ներկայացուցիչը նշել է, որ ուկրաինական «լուրջ» պատվիրակությունը գլխավորում էր Ուկրաինայի պաշտպանության նախարար Ռուստեմ Ումերովը, ով երբեք չի ծառայել բանակում և «ամբողջ կյանքում եղել է հեռախոսային ընկերությունում մենեջեր»։