Պաղեստինում հայտարարել են՝ Երուսաղեմը և նրա սրբավայրերը հուդայականացման են ենթարկվում

Իսրայելը կատարում է գործողություններ, որոնք ուղղված են Երուսաղեմի և նրա սուրբ վայրերի բռնակցմանը և հուդայականացմանը: Այս մասին Բրյուսելում հայտարարել է Պաղեստինի արտաքին գործերի և արտագաղթողների հարցերով պետնախարար Վարսեն Աղաբեկյանը, հաղորդում է WAFA-ն։

«Հորդանան գետի արևմտյան ափին, ներառյալ Արևելյան Երուսաղեմը, տագնապալի իրավիճակ է ստեղծվել», - նշել է պետնախարարը:

«Իսրայելը շարունակում է ագրեսիան, հատկապես Արևմտյան ափի հյուսիսային շրջաններում և փախստականների ճամբարներում, ինչը հանգեցրել է լայնածավալ ավերածությունների։ Բացի այդ, Երուսաղեմը և նրա սուրբ վայրերը ենթարկվում են բռնակցման և հուդայականացման առավել ծայրահեղ ձևերի: Ընդ որում, հրեական մեծ բնակավայրերն էլ ավելի են կտրում քաղաքը նրա Պաղեստինյան շրջակայքից», - հայտարարել է նա։