Դրոնների պատերազմի նոր փուլում Ուկրաինան դանդաղեցնում է Ռուսաստանի առաջխաղացումը

Ուկրաինայի և Ռուսաստանի պատերազմը մտել է իր ամենաթեժ փուլերից մեկը՝ վերածվելով աշխարհում երբևէ տեսած ամենադրոնային հակամարտության։ Թշնամու շարժը վերահսկելու և խոցելու համար առաջնագծում ակտիվ գործում են հազարավոր հետախուզական, բոմբային, կամիկաձե ու նույնիսկ դրոն որսացող սարքեր։ Ուկրաինացի զինվորականները նշում են, որ այս «սպանության գոտում» արդեն շատ քիչ է մնացել, որ թշնամին կարողանա աննկատ մուտք գործել։

Ռուսական բանակը փոխել է մարտավարությունը՝ մեծ զրահապատ շարասյունների փոխարեն այժմ գործում են փոքր խմբերով՝ մոտոցիկլներով ու քվադրոցիկլներով՝ նպատակ ունենալով բացահայտել ուկրաինական դիրքերը և հարվածել դրոններով։ Չնայած դրան՝ Ռուսաստանը շարունակում է դանդաղ, բայց հաստատուն առաջխաղացումը, հատկապես Ուկրաինայի արևելքում ու հյուսիսում, հատնում է Reuters-ը։

Չնայած ԱՄՆ-ի ռազմական օգնության հետ կապված անորոշություններին, ուկրաինական կողմը կարծում է, որ կարող է դեռ ամիսներ դիմակայել՝ շնորհիվ եվրոպական դաշնակիցների ակտիվ աջակցության և տեղական զինարդյունաբերության աճին։ Դրոնների արտադրությունը՝ ներառյալ հարձակողական՝ մինչև $300,000 արժողությամբ մոդելները, դարձել է Ուկրաինայի «ասիմետրիկ պատասխանը» հրթիռների պակասի պայմաններում։ Սակայն պաշտպանական փորձագետները զգուշացնում են՝ դրոնները չեն կարող ամբողջությամբ փոխարինել հրետանու ուժը, հատկապես երբ Ուկրաինան դեռ խիստ կախված է ամերիկյան ՀՕՊ համակարգերից ու հետախուզական արբանյակային տվյալներից։