Տուգանու՞մ են ՌԴ-ում Instagram օգտագործելու համար․ ինչ է իրականում նախատեսում օրենքը

Ռուսաստանյան համացանցային տիրույթում շրջանառվող լուրերը, ըստ որոնց սեպտեմբերից քաղաքացիները կարող են վարչական պատասխանատվության ենթարկվել Instagram և Facebook սոցիալական ցանցերից օգտվելու համար (երկուսն էլ Ռուսաստանում արգելված են և պատկանում են «ծայրահեղական» ճանաչված Meta ընկերությանը), չեն համապատասխանում իրականությանը։ Այդ տեղեկատվությունը հերքել է Դաշնային Խորհրդի սահմանադրական օրենսդրության կոմիտեի առաջին տեղակալ Արտյոմ Շեյկինը։

Նրա պարզաբանմամբ՝ առաջարկվող օրենսդրական փոփոխությունները նախատեսում են տուգանք միայն այն քաղաքացիների համար, ովքեր գիտակցաբար փնտրում և դիտում են այնպիսի նյութեր, որոնք Ռուսաստանի Դաշնության Արդարադատության նախարարության կողմից ներառված են դատարանի որոշմամբ «ծայրահեղական նյութերի» պաշտոնական ցուցակում։

Այսպիսով, արգելափակված սոցիալական ցանց այցելելն ինքնին պատասխանատվության հիմք չէ։ Սակայն նման հարթակներում դիտավորյալ ծայրահեղական բովանդակության որոնումը և դիտումը կարող է պատժվել վարչական տուգանքով՝ 3-ից 5 հազար ռուբլի չափով։