Bild․ ՌԴ բանակը 2025-ին կարող է գրավել տարածք՝ 4 անգամ մեծ Բեռլինից

Գերմանական Bild պարբերականի ռազմական վերլուծաբան Յուլիան Ռեպկեն գնահատել է Ռուսաստանի ԶՈւ առաջխաղացումը 2025 թվականին՝ նշելով, որ այդ տարի ռուսական կողմը կարող է վերահսկողության տակ վերցնել ավելի քան 4000 քառակուսի կիլոմետր տարածք, ինչը 4 անգամ գերազանցում է Բեռլինի մակերեսը։

Նրա հաշվարկով՝ միայն այս տարվա սկզբից ՌԴ ԶՈւ գրավել են շուրջ 2395 քառակուսի կիլոմետր, իսկ 2024-ին՝ 3388 քառակուսի կիլոմետր։ Վերլուծաբանի խոսքով՝ ռուսական կողմի հաջողությունները պայմանավորված են անձնակազմի, տեխնիկայի և անօդաչուների գերակշռությամբ։

Ռեպկեն նաև ռուսական առաջխաղացումը համեմատել է ԵՄ որոշ երկրների և Գերմանիայի Սառլանդ երկրամասի տարածքների հետ։ Ավելի վաղ DeepState-ը հայտնել էր, որ ռուսական բանակը հունիսին գրանցել է ամենամեծ առաջընթացը՝ Դոնեցկի շրջանում՝ Նովոպավլովսկի և Պոկրովսկի ուղղություններով։