Բարսելոնան սահմանափակում է զբոսաշրջային նավերի հոսքը

Եվրոպայի ամենաբեռնված զբոսաշրջային նավահանգիստը՝ Բարսելոնան, կրճատում է իր զբոսաշրջային տերմինալների թիվը՝ փորձելով զսպել զբոսաշրջիկների կտրուկ աճն ու թեթևացնել քաղաքի գերբեռնվածությունը։ Քաղաքապետարանը և նավահանգստի վարչությունը պայմանավորվել են մինչև 2030 թվականը տերմինալների թիվը կրճատել 7-ից 5-ի՝ ուղևորների միաժամանակյա սպասարկման հզորությունը նվազեցնելով 37,000-ից մինչև 31,000։

Այս տարի՝ հունվարից մայիս, նավերով ժամանած զբոսաշրջիկների թիվը աճել է 20%-ով՝ հասնելով 1.2 միլիոնի։ Քաղաքում արդեն տարիներ շարունակ բողոքներ են հնչում գերզբոսաշրջության և քաղաքի պատմամշակութային կենտրոնների գերբեռնվածության դեմ, հայտնում է Reuters-ը։

Նոր պլանի շրջանակում մի քանի տերմինալ կձուլվեն մեկի մեջ, իսկ նավահանգիստը առաջնահերթություն կտա այն նավերին, որոնք Բարսելոնան ընտրում են որպես հիմնական մեկնման և ժամանման կետ։ Քաղաքը ցանկանում է նաև խթանել զբոսաշրջիկների ավելի երկարաժամկետ մնալը։

Նախագիծը նաև նպաստելու է նավերի միացմանը տեղական էլեկտրացանցին՝ նվազեցնելով արտանետումները։ Սա համապատասխանում է ԵՄ պահանջներին, ըստ որոնց՝ մինչև 2030 թվականը բոլոր ծովային նավահանգիստները պետք է ունենան ցամաքային էներգիայի ապահովման ենթակառուցվածքներ։