Զելենսկին կարգադրել է միջազգային դատարաններում Ռուսաստանից 6,9 միլիարդ դոլար բռնագանձել

Ուկրաինայի նախագահ Վլադիմիր Զելենսկին կարգադրել է Ռուսաստանից միջազգային արբիտրաժային դատարաններում ներկայացված հայցերի շրջանակներում 6,9 միլիարդ դոլար բռնագանձել։ Նա այս մասին հայտնել է իր տելեգրամյան ալիքում։

Զելենսկին և Ուկրաինայի «Նավթոգազ» ընկերության ղեկավար Սերգեյ Կորեցկին քննարկել են Կիևի օգտին արբիտրաժային որոշումների իրականացման ուղիները՝ Ուկրաինայի դեսպանների հետ հանդիպման նախապատրաստման շրջանակներում։ Նախագահի խոսքով՝ արդեն իսկ կան միջազգային արբիտրաժային դատարանների մի քանի դրական որոշումներ՝ ընդհանուր 6,9 միլիարդ դոլարի չափով։

«Սրանք բացարձակապես արդար որոշումներ են, որոնք ցույց են տալիս Ռուսաստանի և «Գազպրոմի» պատասխանատվությունը», - գրել է Զելենսկին։

Նրա խոսքով՝ ներկայումս պատրաստվում են կոնկրետ քայլեր այդ միջոցները հավաքագրելու համար, և վաղը Ուկրաինայի դեսպանները կստանան համապատասխան հրահանգները։