Սիրիայում գերիների փոխանակումը խափանվել է հրադադարի խախտման պատճառով

Սիրիայի Աս-Սուվեյդա նահանգում հակամարտող կողմերի միջև համաձայնեցված գերիների փոխանակումը խափանվել է արաբ աշխարհազորայինների կողմից դրուզների դիրքերի վրա հարձակման պատճառով: Այս մասին հաղորդում է ՏԱՍՍ-ը՝ հղում անելով Sham հեռուստաալիքին:

Հաղորդվում է, որ բեդվինական ստորաբաժանումները հարձակվել են Արիկա և Ալ-Մաջդալ շրջանների վրա, որոնք նախկինում վերահսկողության տակ էին վերցրել դրուզների համայնքային ուժերը:

Գերիների փոխանակումը նախատեսված էր տեղական ժամանակով ժամը 18:00-ին: Դրուզ շեյխերը կոչ են արել կողմերին համագործակցել, ինչպես նաև պահանջել են, որ իշխանությունները վերականգնեն բջջային կապը և ինտերնետը, ինչպես նաև էներգամատակարարումը նահանգում:

Նշվում է, որ Դամասկոսի հետ հարաբերությունների կարգավորմանը խոչընդոտող Սիրիայի դրուզների առաջնորդ շեյխ Հիքմեթ ալ-Հաջարիի կողմնակիցները թույլ չեն տվել կառավարության ներկայացուցիչներին մարդասիրական օգնություն տեղափոխել նահանգ: