Հույս ունենք, որ «Զանգեզուրի միջանցքը» կդառնա համաձայնության խորհրդանիշ, այլ ոչ թե տարաձայնությունների աղբյուր․ Էրդողան

«Զանգեզուրի միջանցքը»օգուտ կբերի ոչ միայն Ադրբեջանին, Հայաստանին և Թուրքիային, այլև տարածաշրջանի մյուս երկրներին, մասնավորապես, այն խթան կհաղորդի տնտեսական համագործակցությանը։

Ինչպես հաղորդում է Report-ը, այս մասին Թուրքիայի նախագահ Ռեջեփ Թայիփ Էրդողանը ասել է լրագրողներին՝ ինքնահռչակ «Հյուսիսային Կիպրոսի Թուրքական Հանրապետությունից» վերադառնալուց հետո ինքնաթիռում։

«Թուրքիան այս նախագիծը համարում է չափազանց կարևոր աշխարհաքաղաքական տեսանկյունից։ «Զանգեզուրի միջանցքը» կկապի մեր տարածաշրջանը մյուսների հետ և կվերականգնի առևտուրը։ Մեր հիմնական սպասումն այն է, որ այս երթուղին դառնա համաձայնության խորհրդանիշ, ոչ թե տարաձայնությունների աղբյուր», - ասել է Էրդողանը։

Նրա խոսքով, այս նախագիծը նաև «կնպաստի տարածաշրջանի բարգավաճմանը և լրացուցիչ խթան կհաղորդի տնտեսական համագործակցությանը»։

Էրդողանը վստահություն է հայտնել, որ տարածաշրջանի երկրները կկարողանան ինքնուրույն լուծել «Զանգեզուրի միջանցքի» նախագծի շուրջ բոլոր հարցերը՝ երկխոսության միջոցով։

«Ադրբեջանի նախագահ Իլհամ Ալիևը մեծ նշանակություն է տալիս «Զանգեզուրի միջանցքին»։ Նա ցանկանում է հնարավորինս շուտ մեկնարկել նախագիծը և օգտագործել այս երթուղին ոչ միայն Ադրբեջանի, այլև ամբողջ տարածաշրջանի օգտին», - հավելել է նա։