Հաագայի դատարանը հանել է «Գազպրոմ»-ի ակտիվների վրա դրված արգելանքը Նիդերլանդներում

Հաագայի շրջանային դատարանը չեղարկել է ռուսական «Գազպրոմ» ընկերության ակտիվների բռնագրավման որոշումը Նիդերլանդներում։ Այս մասին հայտնել է Reuters գործակալությունը՝ նշելով, որ խոսքը գնում է ընկերության մասնաբաժինների մասին Wintershall Noordzee-ում և Gazprom International Projects B.V.-ում։

Ակտիվները նախկինում արգելանքի տակ էին հայտնվել ուկրաինական «Ժնիվա» և «Սլավուտիչ-ինվեստ» ընկերությունների հայցերի շրջանակում։ Սակայն դատարանը վճռել է, որ «Գազպրոմ»-ի նկատմամբ գործում է պետական անձեռնմխելիության սկզբունքը, այսինքն՝ օտար պետության կամ պետական ընկերության նկատմամբ դատական հայց ներկայացնելն անհնար է տվյալ իրավասության ներքո։

Հիշեցնենք, որ «Ժնիվա»-ն պահանջում էր մոտ 85 միլիոն եվրո փոխհատուցում՝ «հատուկ ռազմական գործողության» արդյունքում կորցրած հացահատիկի համար։ Ուկրաինական դատարանի որոշումը փորձ էր ճանաչել նաև Նիդերլանդներում, սակայն Հաագայի դատարանը ևս մերժեց նման իրավասությունը։