Լիտվայի քաղաքացուն Ռուսաստանում հեռակա դատապարտել են զինվորական հուշարձանը պղծելու համար

Մոսկվայի դատարանը հեռակա կարգով 23 տարվա ազատազրկման է դատապարտել Լիտվայի քաղաքացի Վալդաս Բարտկևիչյուսին՝ Կուրսկի մարզում գտնվող խորհրդային զինվորների հիշատակը հավերժացնող հուշարձանը պղծելու համար։ Այս մասին տեղեկացնում է ՌԴ դատախազությունը։

Ըստ մեղադրանքի՝ 2023–2024 թթ․ Բարտկևիչյուսը մի քանի ավտոմեքենա է գնել Լիտվայում և փոխանցել ռուսական բանակի դեմ մարտնչող վարձկաններին։

2024-ի նոյեմբերին նա այցելել է Կազաչյա Լոկնյա գյուղի եղբայրական գերեզմանոց և հասարակության ներկայությամբ պղծել է զինվորական հուշարձանը՝ վնասելով դրա վրա գտնվող աստղը։ Ապա իր գործողությունների լուսանկարը հրապարակել է սոցիալական ցանցերում։

Դատարանը նրան նաև 5 տարով արգելել է տեղեկատվական գործունեությամբ զբաղվել։ Նա միջազգային հետախուզման մեջ է, գրում է Лента.ру-ն։