Ուկրաինան պատրաստ է «լիակատար հրադադարի»․ Reuters

Ուկրաինան պատրաստ է «լիակատար զինադադարի»՝ Ստամբուլում Ռուսաստանի և Ուկրաինայի պատվիրակությունների միջև բանակցություններից առաջ։ Այս մասին հաղորդում է Reuters-ը՝ հղում անելով աղբյուրներին։

Նաև հաղորդվում է, որ Կիևը պատրաստ է «խաղաղության ուղղությամբ նշանակալի քայլերի» բանակցությունների առաջիկա փուլում։

Ստամբուլում սկսվել են Ռուսաստանի և Ուկրաինայի միջև բանակցությունների երրորդ փուլի նախապատրաստական աշխատանքները։ Հանդիպումը սպասվում է հուլիսի 23-ի երեկոյան Չիրագանի պալատում. երկու երկրների պատվիրակություններն արդեն մեկնել են Թուրքիա։ Սա այն ամսաթիվն է, որը նախկինում նշել էր Ուկրաինայի նախագահ Վոլոդիմիր Զելենսկին՝ չնայած Մոսկվան պաշտոնապես չի հաստատել տեղեկատվությունը։ 

ՌԻԱ Նովոստիի աղբյուրի փոխանցմամբ՝ ռուսական պատվիրակության կազմը մնացել է անփոփոխ։ Այնտեղ դեռևս ընդգրկված են Ռուսաստանի նախագահի օգնական Վլադիմիր Մեդինսկին, Ռուսաստանի Դաշնության արտաքին գործերի փոխնախարար Միխայիլ Գալուզինը, Ռուսաստանի զինված ուժերի գլխավոր շտաբի գլխավոր վարչության պետ Իգոր Կոստյուկովը և պաշտպանության փոխնախարար Ալեքսանդր Ֆոմինը։