Հովհաննես Թումանյանի «բախտը բերեց»

Հովհաննես Թումանյանի թբիլիսյան բնակարանի վաճառքի խնդիրը տարբեր մեկնաբանությունների առիթ տվեց: Նույնիսկ հակավրացական տրամադրությունները սրվեցին, և տան սովորական վաճառքը «հայկական հետքը ջնջելու» ցանկություն որակվեց որոշ լրատվամիջոցներում:

Տիգրան Սարգսյանի և ՀԳՄ նախագահ Լևոն Անանյանի հանդիպման արդյունքում որոշվեց Անանյանի գլխավորությամբ պատվիրակություն ուղարկել Վրաստան:

Թումանյանի թբիլիսյան տան խնդիրը առկա է 2004 թվականից, բայց միայն հիմա կառավարությունը արձագանքեց: Լուրեր են շրջանառվում, որ Թումանյանի տունը «փրկելու» ցանկություն է հայտնել նաև «Բարգավաճ Հայաստան»-ը: Կարելի է ասել՝ Թումանյանի բախտը բերեց, որ վրացի գործարարը հենց նախընտրական տարում ցանկություն հայտնեց վաճառել տան իր մասնաբաժինը: Իշխանական երկու կուսակցությունները ըստ երևույթին կարծում են, որ սրա վրա կարելի է լավ PR անել:

Երբ Երևանի կենտրոնի պատմամշակութային արժեք ներկայացնող շենքերը քանդվում և դրանց տեղը էլիտար շենքեր են կառուցվում, իշխանության ներկայացուցիչները ասում են, որ դա պետական բյուջեն լցնելու, աշխատատեղեր ստեղծելու համար են անում: Հիմա մեծ է հավանականությունը, որ այդ գնով ձևավորված բյուջեից փող դուրս կգրեն Թումանյանի տունը ձեռք բերելու համար: Խոսքը գնում է մոտավորապես 70000 դոլարի մասին:

Հ. Գ. 70000 դոլարը քիչ փող չէ և դրանով կարելի է մեկ-երկու դպրոց վերանորոգել կամ, ասենք, Թումանյանի ծննդավայրի՝ Դսեղի մշակույթի տունը: