Ճապոնիայում խանութներից հետ է կանչվել 16 000 խաղալիք զենք, որոնք կարող են կրակել մարտական փամփուշտներով

Ճապոնիան շտապ խանութներից հետ է կանչում իրական փամփուշտներով կրակող 16 000 խաղալիք զենք, հաղորդում է Oddity Central-ը։

Ճապոնիայի իշխանությունները հայտարարել են բարձրացված տագնապի ռեժիմ այն բանից հետո, երբ երկրում հայտնաբերվել է մոտ 16 000 պլաստիկ խաղալիք զենք, որոնք կարող են կրակել իրական փամփուշտներով։ Դրանք, որպես մրցանակներ, բաժանվել են խաղալիքների խանութներում։

Ճապոնիայի Ազգային ոստիկանական գործակալությունը (NPA) նախազգուշացում է տարածել, որ սարքերը կարող են իրականում լինել անօրինական հրազեն։ Հաղորդագրության համաձայն՝ զենքերը ներմուծվել են Չինաստանից և վաճառվել՝ որպես անվտանգ խաղալիքներ։ Սակայն ստուգումը ցույց է տվել, որ դրանց դիզայնը թույլ է տալիս դրանք փոփոխել իրական փամփուշտներ օգտագործելու համար։

Նման իրերի տիրապետումը կարող է խախտել Ճապոնիայի «Սրերի և հրազենի վերահսկողության մասին» օրենքը։ Իշխանությունները կոչ են անում մարդկանց անհապաղ հաղորդել նման իրերի մասին մոտակա ոստիկանական բաժանմունք։ Իրավապահ մարմինները շեշտում են, որ այս արտադրանքի օգտագործումը կարող է հանգեցնել լուրջ վնասվածքների։ Բացի այդ, կրակելու դեպքում զենքը կարող է պայթել տիրոջ ձեռքում՝ նյութերի ցածր որակի պատճառով։