Ղազախստանում ռազմական ուղղաթիռ է անհետացել

Ղազախստանի Ալմաթիի մարզում անհետացել է EC-145 ռազմական ուղղաթիռ։ Այս մասին հայտնել է Sputnik Kazakhstan-ը իր Telegram ալիքում։

Ուղղաթիռը անհետացել է ռադարներից պլանային թռիչքի ժամանակ։ Հանրապետության ՀՕՊ ուժերի մամուլի ծառայությունը հայտնել է, որ այն որոնելու համար ուղարկվել են Պաշտպանության նախարարության լրացուցիչ ինքնաթիռներ։

Նախնական տվյալներով՝ ինքնաթիռում եղել է անձնակազմի երեք անդամ։ «Որոնողական-փրկարարական աշխատանքները շարունակվում են Պաշտպանության նախարարության և Արտակարգ իրավիճակների նախարարության ուժերի և միջոցների ներգրավմամբ», - հայտնել է Ղազախստանի Պաշտպանության նախարարությունը։

Որոնողական-փրկարարական գործողությանը մասնակցում է ավելի քան 100 մարդ և մոտ 15 միավոր տեխնիկա, այդ թվում՝ Արտակարգ իրավիճակների նախարարության ինքնաթիռներ և անօդաչու թռչող սարքեր։ Դեպքի վայր է ուղարկվել նաև հատուկ հանձնաժողով միջադեպի բոլոր հանգամանքները պարզելու համար։