Հադրութում խմելու ջրի համակարգի ներքին ցանց կկառուցվի

Հեռուստամարաթոն 2011-ի «Ջուր պարգեւիր, կյանք նվիրիր» կարգախոսի շրջանակներում «Հայաստան» համահայկական հիմնադրամը Լեռնային Ղարաբաղում մեկնարկել է Հադրութ քաղաքի խմելու ջրի ներքին ցանցի կառուցման ծրագիրը:

Ծրագիրը համաֆինանսավորում են Հիմնադրամի ԱՄՆ արեւմտյան շրջանի տեղական մարմինը՝ ի դեմս լոսանջելեսաբնակ բարերարներ տեր եւ տիկին Ջերարդ եւ Փաթրիշիա Թրփանջյանների, եւ ԼՂՀ կառավարությունը:

2008-ին Հիմնադրամը կառուցեց Արջաղբյուր-Հադրութ 22կմ երկարությամբ ջրագիծը, որի շնորհիվ խմելու ջուրը հասնում է շրջկենտրոն: «Ներքին ցանցի կառուցումը կամբողջացնի ծրագիրը՝ ջուրը հասցնելով սպառողին»,- ասում է ԼՂՀ Հադրութի շրջանի վարչակազմի ղեկավարի տեղակալ Էդիկ Դավթյանը:

Կառուցման աշխատանքներն արդեն սկսվել են: Ծրագրով նախատեսվում է կառուցել շուրջ 33կմ երկարություն ունեցող ներքին ցանց, պոմպակայան եւ 2 ջրամբար, վերանորոգել 1970-ականներին կառուցված խորքային հորը, ջրավազաններն ու քյարիզները:

«Խորին շնորհակալություն ենք հայտնում տեր եւ տիկին Թրփանջյաններին իրենց առատաձեռն նվիրատվության համար, որը հնարավորություն կտա խմելու ջրով մատակարարել շուրջ 3200 բնակիչ ունեցող քաղաքին։ Այս առիթով հարկ եմ համարում երախտագիտության խոսքեր հայտնել նաեւ Հիմնադրամի Հոգաբարձուների Խորհրդի անդամ պարոն Ալբերտ Բոյաջյանին, ում շնորհիվ ծրագիրը վերջնականապես ընթացք ստացավ»,- նշում է Հիմնադրամի ԱՄՆ արեւմտյան շրջանի Տնօրենների խորհրդի նախագահ Արա Ագիշյանը:

Հիշեցնենք, որ Ստեփանակերտի թիվ 11 ավագ դպրոցը, որն առանձնանում է իր գրավիչ ճարտարապետական լուծումներով եւ ժամանակակից հարդարանքով, 2010-ին եւս կյանքի կոչվեց Թրփանջյան ընտանիքի հովանավորությամբ: