Պուտինը այլևս չի կարող իր պայմանները թելադրել Ալիևին․ Newsweek

Սիրիայի առաջնորդ Բաշար Ասադին չօգնելը Ադրբեջանի նախագահ Իլհամ Ալիևը համարել է Պուտինի թուլությունը։ Այս մասին հայտնել է Newsweek պարբերականը։

«Բաքուն վերջին տարիներին արդեն ավելի կոշտ քաղաքականություն է վարում՝ ամուր կապեր հաստատելով Թուրքիայի հետ և իրականացնելով Լեռնային Ղարաբաղի գրավումը, որին Ռուսաստանը ոչինչ չէր հակադրել, թեև պետք է ռազմական օգնություն տրամադրեր Հայաստանին՝ Հավաքական անվտանգության պայմանագրի կազմակերպության շրջանակներում», - հայտնել է աղբյուրը։

Ըստ տվյալների՝ Ադրբեջանը հասկացավ, որ Ռուսաստանն այլևս այնքան ուժեղ չէ, որքան ժամանակին կարծում էին։ Ավելին, Ալիևը տեսավ, թե որքան արագ Թուրքիան և Արևմուտքը փոխարինեցին Պուտինին ոչ միայն Սիրիայում, այլև ամբողջ տարածաշրջանում։ Ալիևը հանգեց այն եզրակացությանը, որ Ռուսաստանի հետ սերտ կապն իրականում կարող է ավելի վտանգավոր լինել, քան նրան դիմակայելը:

«Երկու երկրների հարաբերությունները ամենացածր մակարդակի վրա են գտնվում Ադրբեջանի անկախացումից ի վեր։ Բաքվի և Մոսկվայի միջև կապերի թուլացումը սկսվեց, երբ Պուտինը չկարողացավ արագ գրավել Ուկրաինան, և Ալիևը, ինչպես և շատ այլ տարածաշրջանային առաջնորդներ, գիտակցեց Ռուսաստանի խնդիրները: Իսկ Ադրբեջանի հաղթանակը Ղարաբաղյան երկրորդ պատերազմում Ալիևին ստիպեց իր երկիրը դիտարկել որպես առաջատար տարածաշրջանային խաղացող, որին Մոսկվան այլևս չի կարող թելադրել իր պայմանները», - եզրափակել է պարբերականը