Օրբանը խոսել է երրորդ համաշխարհային պատերազմի մասին

Երրորդ համաշխարհային պատերազմի սկսվելու մասին հարցին հստակ պատասխան չկա, սակայն ամբողջ աշխարհը «սառը նախազգացում» ունի։ Այս մասին հայտարարել է Հունգարիայի վարչապետ Վիկտոր Օրբանը, որի խոսքերը մեջբերել է ՌԻԱ Նովոստին։

Նրա խոսքով՝ Դոնալդ Թրամփի՝ Սպիտակ տուն գալու հետ մեկտեղ երրորդ համաշխարհային պատերազմի հավանականությունը նվազել է, բայց չի վերացել։ Եվրոպացի քաղաքական գործիչը նաև նշել է՝ «միշտ չէ, որ փոթորիկ է հաջորդում սառը նախազգացումներին, բայց կան չարագուշակ ստվերներ»։

Դրանց թվում Օրբանը նշել է առաջատար տերությունների միջև աճող լարվածությունը, միջազգային հակամարտությունների թվի աճը, սպառազինությունների մրցավազքը, աշխարհի բաժանումը բլոկների, առևտրային սահմանափակումների և միգրացիայի սաստկացումը։

Հունգարիայի կառավարության ղեկավարը հիշեցրել է, որ, ի տարբերություն գլոբալ հակամարտության, Եվրոպայում հակամարտությունն արդեն ընթացքի մեջ է՝ նկատի ունենալով Ուկրաինայում ռազմական գործողությունները։