ԱՄՆ-ն և ԵՄ-ն համաձայնության են եկել եվրոպական ապրանքների վրա 15% մաքսատուրքի սահմանման շուրջ

ԱՄՆ-ի և Եվրամիության առաջնորդները հայտարարել են, որ իրենց հաջողվել է համաձայնության գալ առևտրային համաձայնագրի պարամետրերի շուրջ: Դոնալդ Թրամփի խոսքով՝ ԵՄ-ից ներմուծվող ապրանքները Միացյալ Նահանգներում կենթարկվեն 15% մաքսատուրքի: Գերմանացի արդյունաբերողները դժգոհ են այս համաձայնագրից, գրում է BBC-ն։

ԱՄՆ նախագահ Դոնալդ Թրամփը հանդիպել է Եվրահանձնաժողովի ղեկավար Ուրսուլա ֆոն դեր Լեյենի հետ Շոտլանդիայի իր գոլֆի ակումբում, որտեղ նա, կարծես թե, մասնավոր այցով է գտնվում։

Մամուլի ասուլիսում Թրամփը հայտարարել է, որ ԵՄ երկրներից Միացյալ Նահանգներ ներմուծվող ապրանքների մաքսատուրքը կկազմի առնվազն 15%: Բացի այդ, նրա խոսքով, ԵՄ երկրները հաջորդ չորս տարիների ընթացքում Միացյալ Նահանգներից կգնեն 750 միլիարդ դոլարի ռազմական տեխնիկա և էներգետիկ ռեսուրսներ, ինչպես նաև կներդնեն 600 միլիարդ դոլար ամերիկյան տնտեսությունում։

Ֆոն դեր Լեյենը, ինչպես հաղորդում են գործակալությունները, ասել է, որ կողմերին հաջողվել է շահավետ գործարք կնքել։

ԱՄՆ-ն և Եվրամիությունը կազմում են ապրանքների և ծառայությունների համաշխարհային առևտրի ընդհանուր ծավալի գրեթե մեկ երրորդը։ ԵՄ-ից ԱՄՆ-ում ապրանքների ներմուծումը զգալիորեն գերազանցում է ԱՄՆ-ից Եվրոպա ապրանքների արտահանումը (606 միլիարդ դոլար՝ նախորդ տարվա 370 միլիարդ դոլարի դիմաց), և Թրամփը այս դեֆիցիտը համարում է լուրջ խնդիր։ Նա սպառնացել է օգոստոսի 1-ից 30% մաքսատուրք սահմանել եվրոպական ներմուծման վրա, եթե համաձայնության չհասնեն։

«Սա լավ գործարք է բոլորի համար։ Դա մեզ ավելի կմերձեցնի։ Որոշ իմաստով, դա գործընկերություն է»,- ասել է Թրամփը։