Սարկոզին Էրդողանին պատասխան նամակ է հղել

Թուրքական «Hurriyet» պարբերականը հրապարակել է մի նամակ, որը, ինչպես պնդում է պարբերականը, Ֆրանսիայի նախագահ Նիկոլա Սարկոզիի պատասխանն է Թուրքիայի վարչապետ Ռեջեբ Թայիփ Էրդողանին։ Նամակում, որը գրվել է Ֆրանսիայի խորհրդարանում Հայոց ցեղասպանության ժխտումը քրեականացնող օրինագծի քննարկումից առաջ, կան այսպիսի տողեր.

«Պարո´ն վարչապետ, ցանկանում եմ նշել, բուն նպատակը ֆրանսիական հասարակության մեջ տասնամյակներ ապրող ժխտման զգացողությունից ազատվելն ու 100-ամյա վերքերը բուժելն է։ Օրինագծում որպես թիրախ ընտրված չէ որևէ կոնկրետ պետություն կամ ժողովուրդ. դա բնորոշ է բոլոր ցեղասպանություններին։ Մենք գիտենք նաև, թե թուրք ժողովուրդն ինչպիսի ցավեր է կրել Համաշխարհային պատերազմի և Օսմանյան կայսրության կործանման ժամանակ։

Գիտեմ, որ դժվար է պատմության հետ դեմառդեմ կանգնելը, բայց Ֆրանսիան սեփական պատմության դեմ իր պարտականությունը կատարել է՝ ընդունելով իր մեղքը ստրկավաճառության, ինչպես նաև Ֆրանսիայում ապրող հրեաներին համակենտրոնացման ճամբարներ ուղարկելու մեջ։ Ես ինքս, որպես նախագահ, դեռևս 2007 թվականին Ալժիրում խոսել եմ այդ երկրում ֆրանսիական գաղութատիրության պատճառով տեղի ունեցած սարսափելի դեպքերի և ալժիրցիների կրած տառապանքների մասին։ 

Թուրքիան մեծ պետություն է և կարևոր դաշնակից Ֆրանսիայի համար։ Ուստի երկուստեք ողջախոհության և առողջ բանականության վրա հիմնվելու կոչ եմ անում։ Այս օրենքի հետ կապված ծայրահեղական քայլերը լուրջ վնաս կհասցնեն երկու բարեկամ երկրների միջև հարաբերություններին, և այդ վնասի ողջ պատասխանատվությունը կընկնի դրանք նախաձեռնող կողմի վրա»։