Փրկարարական աշխատանքներ՝ օդում, ջրում, ցամաքում. ՆԳՆ ՓԾ-ն տեսանյութ է հրապարակել հատուկ նշանակության փրկարարների մասին

Ներքին գործերի նախարարության Փրկարար ծառայության Փրկարարական ուժերի վարչության Հատուկ նշանակության փրկարարական աշխատանքների իրականացման կենտրոնի՝ միջազգային որակավորում ունեցող փրկարարները երեք տասնամյակ է՝ առանձնահատուկ բարդության փրկարարական աշխատանքներ են իրականացնում Հայաստանում և երկրի սահմաններից դուրս։

Հատուկ նշանակության փրկարարական աշխատանքների իրականացման կենտրոնը ստեղծվել է Հատուկ փրկարարական ջոկատի հիմքի վրա. նախկինում կոչվում էր Արագ արձագանքման փրկարարական ջոկատ։ Առաջին պետական փրկարարական կազմավորումը ստեղծվել է 1997 թվականի սեպտեմբերի 4-ին։ Ջոկատի կազմավորման օրն էլ նշվում է որպես Փրկարարի օր։
Կենտրոնն ունի 7 ջոկատ, որոնցից 4-ը փրկարարական ջոկատներ են, մեկը՝ կինոլոգիական, մեկը՝ ջրասուզական, իսկ մեկն էլ մասնագիտացված մոտոցիկլետավարների օղակ է։

Կենտրոնն ունի տարբեր մասնագիտություների 94 փրկարար՝ հետախույզ-կինոլոգներ, լեռնափրկարար-դեսանտներ, ջրասուզակներ, անօդաչու թռչող սարքերի հրահագիչներ, մոտոցիկլավարներ, ընդհանուր պրոֆիլի փրկարարներ։
ՀՆՓԱԻԿ-ը ՄԱԿ-ի Միջազգային որոնողափրկարարական խորհրդատվական խմբի անդամ է։ ՀՆՓԱԻԿ պետ Հայկ Նաղդալյանի խոսքով՝ «Կենտրոնը Ինսարագ թիմի անդամ է դարձել 2015 թվականին, ինչը մեծ ձեռքբերում է Փրկարար ծառայության համար. մենք ոչ միայն Հայաստանի տարածքում կարող ենք փրկարարական աշխատանքներ կատարել, այլև որակավորված ենք այլ երկրներում տեղի ունեցած աղետներին արձագանքնել»։

ՀՆՓԱԻԿ-ը բարձր պատրաստականության ստորաբաժանում է՝ համալրված հատուկ փրկարարական գույքով, սարքավորումներով, մեխանիզմներով:
Կենտրոնն ունի միջազգային չափորոշիչներին համապատասխան պահեստ, որտեղ կան համապատասխան գույներով դասակարգված՝ անհրաժեշտ պարագաներով արկղեր, որոնցում կա նաև մշտապես թարմացվող սնունդ: Այլ կերպ ասած՝ փրկարարները ամեն պահի պատրաստ են մեկնել աշխարհի ցանկացած կետ՝ օգնություն ցուցաբերելու։ Սիրիա, Իրան, Թուրքիա, Վրաստան, Ռուսաստանի Դաշնություն… Բոլոր դեպքերում ՀՆՓԱԻԿ-ի փրկարարներն արձագանքել են արագ՝ աղետի գոտիներում իրականացնելով ջրափրկարարական, լեռնափրկարարական, որոնողափրկարարական, վթարավերականգնողական աշխատանքներ։

Կենտրոնի մասնագիտացված ստորաբաժանումների ծառայողները վարժանքների և տարաբնույթ պարապմունքների միջոցով մշտապես կատարելագործում են իրենց մասնագիտական ունակությունները։

Ինչպես ասում են՝ նրանք փրկում են ամենուր՝ օդում, ջրում, ցամաքում։
Անօդաչու թռչող սարքավորումների մասնագիտացված խումբն իրականացնում է ինչպես իրազեկման, այնպես էլ փրկարարական աշխատանքներ:

«Դրոնները նախատեսված են որոնողափրկարարական և հետախուզության համար՝ մարդ որոնելու, ինչպես նաև խոշոր հրդեհների ժամանակ հետախուզություն անելու՝ հրդեհի չափը, տարածման ուղղությունները ճշտելու համար, որպեսզի ավելի օպերատիվ, ավելի ճիշտ կազմակերպվեն հրդեհաշիջումը և որոնողափրկարարական աշխատանքները»,-ասում է ՀՆՓԱԻԿ խմբի ավագ հրահանգիչ Ռուբիկ Մարգարյանը։

Ոչ մի կանչ մյուսին նման չէ. ամեն մի կանչ մի պատմություն է՝ փրկված կյանքեր, օգնության ձեռք մեկնելու հնարավորություն…

Ներկայացնում է հետախույզ կինոլոգիական ջոկատի հրամանատար էդգար Գալոյանը. «Ջոկատի հաշվարկում ունենք 10 փրկարար շուն. 6-ը փլատակներում մարդկանց է որոնում, 3-ը՝ զոհվածների մարմինները, իսկ 1-ը զենք-զինամթերք, պայթուցիկներ որոնելու համար է»։

Ջրասուզական ջոկատի հրամանատարն ասում է, որ ջրասուզակի աշխատանքը բարդ է, բայց նաև՝ հետաքրքիր. այն հմտություններ է պահանջում: Ասում է նաև, որ ջրից վախենալ պետք չէ, բայց զգուշությունը կօգնի կյանքեր փրկել։

Լեռնափրկարար դեսանտ Սամվել Կոլյանի խոսքով՝ փրկարար լինելը կենսակերպ է, իսկ ամեն հաղթահարած լեռը, փրկված կյանքը ավելի ուժեղ են դարձնում։

ՀՆՓԱԻԿ-ի փրկարարների երազանքը մեկն է՝ աղետներն ու դժբախտ պատահարները հասնեն նվազագույնի, իսկ իրենք գիտելիքներն ու հմտությունները դրսևորեն միայն վարժանքների և դասընթացների ժամանակ:

Այդուհանդերձ, եթե հնչեց ահազանգը, իմացեք, որ նրանք կգան: