Ադրբեջանամետ Սերգեյ Մարկովը Ռուսաստանին մեղադրել է AZAL-ի ինքնաթիռի կործանման մեջ

Ռուս ադրբեջանամետ քաղաքագետ և ՌԴ Պետդումայի նախկին պատգամավոր Սերգեյ Մարկովը հայտարարել է, թե 2024 թվականի դեկտեմբերի 25-ին Ղազախստանի Ակտաուի մոտակայքում կործանված «Ադրբեջանական ավիաուղիներ» ավիաընկերության ուղևորատար ինքնաթիռը խոցվել է Ռուսաստանի կողմից։ Նա այս մասին ասել է «Царьград» հեռուստաալիքի եթերում, տեսանյութը հրապարակվել է Telegram-ում։

Ըստ Մարկովի՝ հենց այս ինքնաթիռի վթարն է պատճառ դարձել Ռուսաստանի և Ադրբեջանի միջև հարաբերությունների վատթարացմանը։

«Մենք խոցեցինք այդ ինքնաթիռը, և դա բավականին պարզ է։ Հաստատ հայտնի է, որ մենք ենք խփել ինքնաթիռը։ Եվ Ադրբեջանը գիտի, որ Ռուսաստանի իշխանությունները հաստատ գիտեն, որ իրենք են խփել ինքնաթիռը», - ընդգծել է Մարկովը։

Նա հիշել է, թե ինչպես 2020 թվականին, Լեռնային Ղարաբաղում Բաքվի ագրեսիայի ժամանակ, Ադրբեջանը, իբր, «պատահաբար» խոցել է ռուսական ռազմական ուղղաթիռը Հայաստանի տարածքում։ Բաքուն նույն օրը ստանձնել է պատասխանատվությունը, պաշտոնապես ներողություն խնդրել և առաջարկել փոխհատուցում։

Հիմա, ինչպես նշել է Մարկովը, Ադրբեջանը նույն պատասխանն է սպասում Մոսկվայից, սակայն Ռուսաստանը չի ընդունում իր մեղքը՝ արդարանալով նրանով, որ ինքնաթիռը խոցած ռուսական ՀՕՊ-ն, իբր, հետ է մղել ուկրաինական անօդաչու թռչող սարքերի հարձակումը։