Ունենալու ենք 1.7 անգամ ավելի շատ տարեկան արտահանում. Պապոյան

Կառավարությունը հուլիսի 31-ի նիստում ընդունեց Հայաստանի Հանրապետության արտահանման խթանման 2025-2030 թվականների ռազմավարական ծրագիրը և դրա կատարումն ապահովող գործողությունների ծրագիրը հաստատելու մասին որոշումը:

«Այն ունի և ունենալու է առանցքային նշանակություն մեր երկրի տնտեսական զարգացման երկարաժամկետ տեսլականի իրագործման համար: Այս ռազմավարությամբ մենք քայլեր ենք ձեռնարկում՝ ձևավորելու կայուն աճ ապահովող արտահանման կառուցվածք՝ հիմնված բարձր ավելացված արժեքի, տեխնոլոգիական առաջընթացի, որակի և ապրանքների և ծառայությունների մրցունակության բարձրացման վրա»,- մանրամասնել է էկոնոմիկայի նախարար Գևորգ Պապոյանը և հավելել, որ վերջին տարիներին արձանագրվել է արտահանման զգալի աճ, որը, սակայն, հիմնականում պայմանավորված է արտաքին, հաճախ նաև ժամանակավոր գործոններով և չի արտացոլում ՀՀ տնտեսության արտահանման ամբողջական ներուժը:

Միաժամանակ, ըստ նախարարի՝ արտահանման շուկաների կենտրոնացվածության բարձր աստիճանը շարունակում է մնալ էական մարտահրավեր մեր տնտեության համար՝ սահմանափակելով մեր հնարավորությունները համաշխարհային շուկաներում դիրքավորվելու առումով:

«Այս ռազմավարությունը պատասխանում է նաև այդ հիմնախնդիրներին, որոնց բախվում են մեր տեղական արտադրողները արտահանման շղթայի տարբեր փուլերում՝ սկսած շուկայի հասանելիությունից մինչև որակի ենթակառուցվածքների հաճախ ոչ բավարար կամ անբավարար լինելը: Մեր նպատակն է ձևավորել քաղաքականություն, որը կստեղծի կանխատեսելի և աջակցող միջավայր արտահանման գործընթացների անխոչընդոտ և մեծ ծավալներով կազմակերպման համար: Ռազմավարման հիմքում ընկած է համապարփակ վերլուծական աշխատանք՝ բաղկացած հստակ տեսլականից, այն է՝ արտահանման վրա հիմնված տնտեսական աճի խթանման միջոցով նպաստել երկրի, բնակչության բարեկեցության աճին և տնտեսության կայուն զարգացմանը»,- նշել է Գևորգ Պապոյանը:

Նա ասաց, որ ռազմավարությունը բաղկացած է 5 ռազմավարական հենասյուներից և դրանց իրականացմանն ուղղված 50-ից ավելի միջոցառումներից:

Ռազմավարական նպատակներն են՝

• արտահանմանը նպաստող և մրցունակ միջավայրի ապահովում,
• ենթակառուցվածքների զարգացում և լոգիստիկ հասանելիության ապահովում,
• արտահանողների և նրանց կարողությունների զարգացում,
• արտահանման շուկաների ընդլայնում,
• արտահանման խթանում և ֆինանսավորում: 

«Ընդհանուր միջոցառումները վերաբերում են, ըստ էության, բոլոր ապրանք և ծառայություններ արտահանողներին, իսկ ապրանքային միտվածության միջոցառումները վերաբերում են համապարփակ և բազմաշերտ հետազոտության արդյունքում ընտրված ուղենշային 25 ապրանքային խմբերի արտահանմանը, որոնց համար գնահատվել են առկա և պոտենցիալ ունեցող շուկաները Անսոֆի մատրիցայի մեթոդաբանությամբ»,- ասել է էկոնոմիկայի նախարարը:

Նախարարի խոսքով՝ ծրագրի իրականացման արդյունքում նախատեսվում է ունենալ տեղական արտահանման աճ մոտ 1.7 անգամ. թվային, դոլարային արտահայտմամբ 16.9 մլրդ ամերիկյան դոլար, որտեղ ծառայությունների արտահանումը կանխատեսվում է հասցնել 10.3-ի, իսկ ապրանքների և տեղական արտահանումը՝ տարեկան 6.6 միլիարդի:

«Ծրագրի իրականացման համար նախատեսվում է ծախսել շուրջ 98 մլրդ ՀՀ դրամ կամ այսօրվա փոխարժեքով ավելի քան 250 մլն ԱՄՆ դոլար, ընդ որում՝ միջոցները հիմնականում նախատեսված են օգտագործել վերջին տարիներին՝ 27, 28, 29 թվականներին, իսկ սկզբնական փուլում իրականացվելու է օրենսդրական լավարկումների և ինստիտուցիոնալ միջավայրի բարելավում: Այսինքն՝ պետությունը ծախսում է 250 մլն դոլար 5 տարվա արդյունքում, և վերջում ունենալու ենք 1.7 անգամ ավելի շատ տարեկան արտահանում: Սա, կարծում եմ, շատ հիմնավոր և շատ լավ ներդրում է, եթե մենք կարողանանք այս թվերով այսպիսի մեծ ծավալի արտահանում ապահովել: 

Համոզված ենք, որ ռազմավարության իրականացումը էապես կխթանի արտահանման կայուն զարգացումը, կնպաստի տնտեսության արտադրողականության բարձրացմանը, կստեղծի նոր աշխատատեղեր, կդարձնի ՀՀ-ն ավելի հուսալի և մրցունակ գործընկեր միջազգային շուկաներում»,-եզրափակել է նախարարը: