Հայկական Ժամանակ. «Անհետաձգելի հարցեր»

«ԼՂ հիմնախնդրի հետ կապված իմ լավատեսությունը պայմանավորված է ժողովրդագրական իրավիճակով: Ադրբեջանի բնակչությունը աճում է. մենք հիմա 9 միլիոն 100 հազար քազաքացի ունենք: Իսկ ՀՀ բնակչությունը տարեցտարի նվազում է: Դա տեղի է ունենում ինչպես բնական գործընթացների, այնպես էլ այնտեղ տիրող հուսալքության, գործազրկության և զանգվածային ապատիայի պատճառով: Այդ բոլոր գործոնները ամրապնդում են մեր լավատեսությունը»,- երեկ Ադրբեջանի անկախության 20-րդ տարեդարձի առթիվ կազմակերպված պաշտոնական ընդունելությանը նման հայտարարություն է արել Իլհամ Ալիևը: Երեկ Բաքվում Ալիևի հետ է հանդիպել ԱՄՆ պետքարտուղարի առաջին տեղակալ Ուիլյամ Բերնսը: Վերջինս այդ հանդիպումից հետո լրագրողների հետ զրույցում հայտարարել է, որ ԼՂ հակամարտության շուրջ ստատուս քվոն չի կարող երկար պահպանվել, և այդ իսկ պատճառով ԱՄՆ-ն հարցը համարում է անհետաձգելի ու որպես ԵԱՀԿ-ում համանախագահող երկիր՝ քայլեր է ձեռնարկելու դրա կարգավորման համար»,- գրում է «Հայկական ժամանակ» թերթը: