Պուտինը երբեք պաշտոնապես արձակուրդ չի գնում․ Պեսկով

Ռուսաստանի նախագահ Վլադիմիր Պուտինը երբեք պաշտոնապես չի գնում արձակուրդ, քանի որ պետության ղեկավարի գործառույթները լիարժեք հանգստի հնարավորություն չեն տալիս։ Այս մասին հայտարարել է նախագահի մամուլի քարտուղար Դմիտրի Պեսկովը Life-ի լրագրող Ալեքսանդր Յունաշևի հետ հարցազրույցում։

«Օգոստոսը համարվում է պաշտոնյաների և քաղաքական գործիչների համար ավանդական արձակուրդային ամիս, բայց Պուտինը հանգստանալու ժամանակ չունի»,-նշել է լրագրողը։

Պեսկովի խոսքով՝ պետության ղեկավարը գործնականում երբեք պաշտոնական արձակուրդ չի գնում՝ չնայած երբեմն նախագահը կարողանում է մի քանի օր արձակուրդ հատկացնել։ «Սակայն, նույնիսկ նման արձակուրդները լիարժեք չեն, քանի որ նախագահը շարունակում է կատարել իր պարտականությունները»-, բողոքել է Պեսկովը։

Միևնույն ժամանակ, մեկ այլ հարցազրույցում Պեսկովը նշել է, որ պետության ղեկավարը երբեմն լողում է ծովում, երբ մեկնում է Սոչի, բայց միայն այն դեպքում, եթե իր աշխատանքային գրաֆիկը թույլ է տալիս դա։