Բաքուն պատասխանել է Ռուսաստանին, մեղադրել հայկական կողմին «վանդալիզմի» մեջ

Ադրբեջանի արտաքին գործերի նախարարության մամուլի քարտուղար Այխան Հաջիզադեն X սոցիալական ցանցի իր էջում Հայաստանին մեղադրել է «վանդալիզմի» մեջ։ Այս կերպ նա արձագանքել է ռուսական կողմի քննադատություններին՝ կապված օկուպացված Ստեփանակերտում հայազգի անվանի ծովանկարիչ Հովհաննես Այվազովսկու հուշարձանի ապամոնտաժման հետ։

«Հայկական վանդալիզմը՝ գործողության մեջ։ Սա լիկբեզ է նրանց համար, ովքեր երբեք չեն խոսել Ադրբեջանի ոչնչացված մշակութային ժառանգության պաշտպանության մասին», - գրել է Հաջիզադեն։

Հիշենք, որ նախորդ օրը Ադրբեջանի արտաքին գործերի նախարարությունը արձագանքել էր ՌԴ նախագահի հատուկ ներկայացուցիչ Միխայիլ Շվիդկոյի՝ Այվազովսկու հուշարձանի ապամոնտաժման վերաբերյալ հայտարարություններին։

Նաև նախորդ օրը Հաջիզադեն տեղական լրատվամիջոցների համար տված մեկնաբանության մեջ ափսոսանք էր հայտնել, որ վերջերս Շուշի այցելած Շվիդկոյը չի դատապարտել «ադրբեջանական հուշարձանների նկատմամբ վանդալիզմը»։