Քանի՞ դիմորդ է այս տարի ընդունվել բուհ․ թափուր է մնացել 1,174 տեղ
Գիտություն և Մշակույթ
Հուլիսի 30-ին, ընդունելության կարգի համաձայն, Կրթության, գիտության, մշակույթի և սպորտի նախարարի հրամանով հաստատվել են բուհերի ընդունելության լրացուցիչ փուլի (թափուր տեղերի) մրցույթի արդյունքները։ Այս մասին մամուլի ասուլիսի ժամանակ ասել է Գնահատման և թեստավորման կենտրոնի փոխտնօրեն Կարո Նասիբյանը:
Նա նշել է, որ հունվարի 15-ից մինչև հուլիսի 10-ը ընկած ժամանակահատվածում Գնահատման և թեստավորման կենտրոնը կազմակերպել է միասնական քննություններ, որին մասնակցել են 41,500-ից ավելի դիմորդներ: Բուհերում այս տարի հատկացված էր պետական և ոչ պետական 2,142 անվճար և 9,984 վճարովի տեղ։
«Երկրորդ և երրորդ փուլերում հայտագրվել են 16,011 դիմորդներ։ Ընդ որում, ապրիլի 15-ից մինչև մայիսի 10-ը՝ 15,953, հունիսի 26-ը հուլիսի 1-ը՝ 58: Երկրորդ փուլը, որը մենք նախկինում անվանում էինք հիմնական փուլ, այդտեղ հայտագրում են և՛ մասնագիտությունը, և՛ բուհը և եթե դիմորդը հունվար-փետրվար ամիսների քննություններից բավարար միավորներ է ունենում և գտնում է, որ անհրաժեշտություն չկա նոր միասնական քննություն հանձնելու՝ կարող է նոր քննության չհայտագրվի, բայց պարտադիր է բուհը և մասնագիտությունը նշելը», - ասել է ԳԹԿ փոխտնօրենը, հավելելով, որ, այնուամենայնիվ 125 հոգի չի նշել պահանջվածը, սակայն նրանց, վերապահումով թույլատրվել է մասնակցել լրացուցիչ փուլի մրցույթին։
Երկու դրական գնահատականներով չեն ընդունվել 1,999 հոգի, այսինքն՝ նրանք այն դիմորդներ են, որոնք կարող են մասնակցել լրացուցիչ փուլի մրցույթներին։ Հիմնական փուլի արդյունքներով բուհ են ընդունվել 7,719 դիմորդ, խոսքը հիմնական փուլի մասին է, իսկ ներբուհական քննություններով՝ 2,069-ը, այսինքն, ընդհանուր՝ 9,788 հոգի:
«Երբ հիմնական փուլի մրցույթի արդյունքները արդեն հայտնի էին, ունեինք թափուր 2,355 տեղեր, անվճար՝ 264 և վճարովի՝ 2,091: Մրցույթի լրացուցիչ փուլում հայտագրվել է 1,478 դիմորդ, այսինքն՝ մոտ 500 դիմորդ չեն հայտագրվել» , - ընդգծում է Նասիբյանը, հավելելով, որ նրանք, ըստ ամենայնի այն դիմորդներն են, որոնք իրենց գնահատականները պահում են հեռակա ուսման մրցույթի մասնակցելու համար, կամ այն դիմորդները՝ որոնք զորակոչվել են բանակ։
Երկու փուլերի մրցույթների արդյունքում դուրս են մնացել ընդհանուր առմամբ 296 դիմորդ, որոնք ունեցել են դրական գնահատականներ, սակայն որևէ բուհ չեն ընդունվել։ Լրացուցիչ փուլի, այսինքն՝ երկրորդ մրցույթը կազմակերպելուց հետո թափուր են մնացել ընդհանուր առմամբ 1,174 տեղ, անվճար՝ 219 և վճարովի 955 տեղ։
Ըստ վիճակագրության հայաստանյան բուհերի՝ դիմորդների թվով թոփ 3 տեղերում են հետևյալ համալսարանները.
- Երևանի պետական համալսարան
- Հայաստանի պետական տնտեսագիտական համալսարան
- Հայաստանի ազգային պոլիտեխնիկական համալսարան
ՈՒՂԻՂ ԵԹԵՐ
Ամենադիտված 
Ընտանիք․ Անահիտ Կիրակոսյանի նախկին ամուսինը նոր լուսանկար է հրապարակել (Լուսանկար)
