NASA-ն հաստատել է «Ռոսկոսմոսի» հետ երկխոսության շարունակումը

ԱՄՆ-ում այցով գտնվող «Ռոսկոսմոսի» գլխավոր տնօրեն Դմիտրի Բականովը հայտարարել է, որ NASA-ի պաշտոնակատար տնօրեն Շոն Դաֆին հավանություն է տվել ռուսական կողմի հետ երկխոսության շարունակմանը։ Այս մասին հայտնում է ՏԱՍՍ-ը։

Բականովը նշել է, որ սա կողմերի առաջին հանդիպումն էր, և կարևոր էր ստանալ NASA ղեկավարի թույլտվությունը՝ պահպանելու գործող համագործակցությունը։ Քննարկվել են ազգային նոր ուղեծրային կայանների հեռանկարները, որոնք պետք է փոխարինեն Միջազգային տիեզերակայանին, ինչպես նաև՝ խորը տիեզերքի ոլորտում համագործակցության հնարավորությունները։

Բականովը հավելել է, որ հնարավոր հաջորդ հանդիպումը կարող է կայանալ նոյեմբերին կամ դեկտեմբերին, սակայն օրակարգի ձևավորումը կախված կլինի նաև աշխարհաքաղաքական իրավիճակից։ Նրա գնահատմամբ՝ ներկայիս պայմաններում ռուս-ամերիկյան մասշտաբային տիեզերական ծրագրերի հեռանկարների մասին խոսելն «մի քիչ ամբիցիոզ» է։