Չնայած Wall Street-ի ռեկորդներին՝ ներդրողները կասկածում են ԱՄՆ շուկայի գերազանցությանը

Չնայած ԱՄՆ ֆոնդային շուկայի աճին և դոլարի կարճաժամկետ վերականգնմանը, համաշխարհային ներդրողները սկսել են վերանայել իրենց վստահությունը ամերիկյան շուկայի նկատմամբ։ Reuters-ի տվյալներով՝ աճող մաքսային անորոշությունը, բյուջետային դեֆիցիտը և պետական պարտքի աճը խաթարում են համոզմունքը, թե ԱՄՆ ակտիվները կշարունակեն գերակշռել համաշխարհային շուկաներում։

Վերջին հարցման արդյունքում պարզվել է, որ $4.9 տրիլիոն ակտիվներ կառավարող ինստիտուցիոնալ ներդրողների 47%-ը կրճատում է ԱՄՆ շուկայի իրենց երկարաժամկետ ներդրումային մասնաբաժինը։ Չնայած Թրամփի վարչակազմի կողմից ԵՄ-ի, Ճապոնիայի և Հարավային Կորեայի հետ կնքված առևտրային համաձայնագրերին՝ ներդրողները շարունակում են զգուշանալ նոր մաքսատուրքերի հնարավորություններից։

Տարադրամային ոլորտում նույնպես նկատվում է վստահության անկում։ Դոլարի՝ գլոբալ պահուստային արժույթի դերը կասկածի տակ է դրվում, մասնավորապես այն բանից հետո, երբ ԱՄՆ կորցրել է ազատ առևտրի առաջնորդի դիրքը։ Այս իրավիճակը խորանում է նաև այն պատճառով, որ ֆինանսական շուկաները քաղաքականացվում են, իսկ նախագահ Թրամփը բացեիբաց կոչ է անում իջեցնել տոկոսադրույքները՝ սպառնալով հեռացնել Ֆեդերալ պահուստային համակարգի ղեկավարին։

Սակայն տեխնոլոգիական ոլորտը և առաջատար ամերիկյան ընկերությունները դեռևս պահպանում են շուկայի հավատը։ Մի շարք վերլուծաբաններ ընդգծում են, որ ԱՄՆ-ն ունի աշխարհի ամենանորարարական և շահութաբեր ընկերությունները, իսկ արհեստական բանականության (AI) աճող դերը խոստանում է շուկայի նոր վերելք։ Այնուամենայնիվ, աճող պարտքը և մաքսային ճնշումները շարունակում են ստեղծել լուրջ ռիսկեր՝ ԱՄՆ գերակայության երկարաժամկետ հեռանկարի համար։