Ռուսական ռազմաօդային բազաները կստանան պաշտպանություն՝ ուկրաինական դրոններից

Ռուսաստանի ռազմաօդային ուժերի (ՎԿՍ) բոլոր ռազմական օդանավակայանները փուլ առ փուլ կթաքցվեն հատուկ պաշտպանական կառույցների մեջ՝ Ուկրաինայի զինված ուժերի դրոնային հարձակումներից զերծ մնալու համար։ Այս մասին հայտարարել է ՎԿՍ գլխավոր շտաբի պետ, առաջին փոխհրամանատար գեներալ-լեյտենանտ Ալեքսանդր Մաքսիմցևը «Կրասնայա զվեզդա» թերթին տված հարցազրույցում։

Նրա խոսքով՝ պաշտպանական կառույցների կառուցումը սկսվել է դեռ երկու տարի առաջ, իսկ երկարաժամկետ նպատակն է՝ նման պաշտպանությամբ ապահովել ՌԴ ԶՈՒ ամբողջ օդանավակայանային ցանցը, հայտնում է Лента.ру-ն։

Հիշեցնենք, որ հունիսին Ուկրաինան հարվածել էր մի շարք ռուսական ռազմաօդային բազաներին, ինչից հետո հարց բարձրացվեց՝ ինչու են ՌԴ ռազմավարական ռմբակոծիչները մնում բաց երկնքի տակ։ Նույն ամսին Բրիտանիայի պաշտպանության նախարար Ջոն Հիլին գովեստով էր անդրադարձել Ուկրաինայի այդ հարձակումներին՝ որպես ռազմավարական նշանակության գործողությունների։