Զինված ապստամբության մեջ մեղադրվող նախկին նախագահը մերկացել է բանտախցում՝ խուսափելով հարցաքննությունից

Հարավային Կորեայի նախկին նախագահ Յուն Սոկ Յոլը, ով մեղադրվում է պետական դավադրության մեջ, մերկացել է բանտախցում և պառկել հատակին, որպեսզի խուսափի հատուկ դատախազի թիմի հարցաքննությունից։ Ինչպես հաղորդում է CBS News-ը, դատարանի կողմից արդեն իսկ տրված էր ձերբակալության որոշում, սակայն քննիչները նախընտրել էին խաղաղ բանակցել։

Հատուկ դատախազի օգնական Օ Չոն Հին հայտնել է, որ Յունը «պառկել է հատակին առանց բանտային համազգեստի և ակտիվորեն դիմադրել»։ Հետաքննողները հրաժարվել են ուժ կիրառել՝ անվտանգության նկատառումներից ելնելով, սակայն նախազգուշացրել են, որ հաջորդ անգամ կիրականացնեն ձերբակալման որոշումը։

Արդարադատության նախարար Չոն Սոն Հոն հավելել է, որ Յունը հանել էր շորտերն ու շապիկը, սակայն հետագայում կրկին հագել էր դրանք, երբ քննիչները հեռացել էին։ Նրա փաստաբանը՝ Յու Չոն Հվան, քննադատել է իրավապահներին՝ նախկին նախագահի արժանապատվությունը խախտելու համար։

Հիշեցնենք, որ 2024 թվականի դեկտեմբերի 3-ին Յուն Սոկ Յոլը հայտարարել էր ռազմական դրություն՝ ընդդեմ Հյուսիսային Կորեայի համակիրների՝ ինչը հանգեցրել էր մի շարք մեղադրանքների, այդ թվում՝ զինված ապստամբության։