Ռուսաստանում առաջարկում են արգելել ռուսերեն չիմացող արտասահմանցիների աշխատակցումը մի շարք ոլորտներում

ՌԴ աշխատանքի նախարարությունը ներկայացրել է նոր նախագիծ, ըստ որի՝ վիզային ռեժիմով ժամանած և ռուսերեն չիմացող օտարերկրացիները չեն կարող աշխատել այն ոլորտներում, որոնք պահանջում են սոցիալական շփում։ Այս մասին հայտնում է Коммерсантъ-ը։

Փաստաթուղթը վերաբերում է մասնագիտություններին, որոնք ենթադրում են անմիջական փոխգործակցություն ռուս քաղաքացիների հետ՝ այդ թվում վարորդներ, վաճառողներ և բուժաշխատողներ։ Նախատեսվում է, որ կարգավորումը կկիրառվի այն աշխատողների նկատմամբ, ովքեր աշխատում են քվոտայով։

Միջոցառումը կարող է ազդել հիմնականում Չինաստանից, Հնդկաստանից, Թուրքիայից և մի շարք այլ երկրներից ժամանած որակյալ մասնագետների վրա։ Ավելի վաղ Սանկտ Պետերբուրգի նահանգապետ Ալեքսանդր Բեգլովը արգելել էր միգրանտների աշխատանքը տաքսի ոլորտում՝ տրամադրելով երեք ամսվա ժամկետ ընկերություններին՝ արտասահմանցիների հետ պայմանագրերը դադարեցնելու համար։