«Սատանայական բանաստեղծություններ»-ի հեղինակին ցանկացել են վերացնել

Ինչպես հայտնում է Reuters գործակալությունը` հնդկական արմատներով բրիտանացի գրող Սալման Ռուշդին հրաժարվել է մասնակցել հնդկական Ջայպուր քաղաքում կայանալիք գրական փառատոնին: «Սատանայական բանաստեղծություններ» սկանդալային վեպի հեղինակը այդ որոշումը ընդունել է այն բանից հետո, երբ հայտնի է դարձել, որ հնդիկ մահմեդականները «որոշ ակցիաներ» են անցկացնելու: Թեև մահմեդականները չէին մանրամասնել, թե ինչ բնույթ են կրելու այդ «միջոցառումները», բայց «The Times of India»-ի տեղեկությամբ` Ռաջաստան և Մուհարաշտրա շրջանների գաղտնի ծառայությունները գրողին խորհուրդ են տվել հրաժարվել Հնդկաստան գնալու մտքից, որովհետև հայտնի է դարձել, որ «որոշ մարդիկ» գրողին վերացնելու նպատակ ունեն: Մահմեդականները գրողի որոշման մասին իմանալուց հետո չեղյալ են համարել ակցիաները, որոնք պետք է անցկացվեին այսօր: Փառատոնի կազմակերպիչները մտադիր են փառատոնի ընթացքում կապ հաստատել գրողի հետ:

1988 տպագրված և բազմիցս վերահրատարակված «Սատանայական բանաստեղծություններ» վեպը առաջացրել է մահմեդական աշխարհի ցասումը, որովհետև վեպի կերպարներից մեկի նախատիպը Մուհամեդն է: Ժամանակին Իրանի հոգևոր առաջնորդը՝ Խոմեյնին նույնիսկ հրապարակավ անիծել էր Ռուշդիին, դատապարտել մահվան և մարդասպաններ վարձել գրողին վերացնելու համար: Աղմկահարույց վեպը արգելված գրականություն է Հնդկաստանում, Պակիստանում, Իրանում և մի շարք այլ մահմեդական երկրներում: