Էստոնիա–Ռուսաստան սահմանին հսկայական հերթեր են առաջացել՝ զբոսաշրջիկները բողոքում են

Ռուսաստանի և Էստոնիայի միջև գտնվող «Նարվա–Իվանգորոդ» անցակետում արձանագրվել են հսկայական հերթեր, որոնց պատճառը արձակուրդային սեզոնի սկիզբն ու շոգ եղանակն է։ Ինչպես հայտնում է Shot Telegram-ալիքը՝ հղում տալով էստոնացի զբոսաշրջիկներին, սահմանը հատելու համար Էստոնիայի կողմից մարդիկ ստիպված են սպասել մինչև 10 ժամ։

Էստոնացի զբոսաշրջիկները դժգոհում են, որ հերթերը հատուկ արհեստականորեն են առաջացվում՝ Ռուսաստանի այցելությունները սահմանափակելու նպատակով։ Նրանք ընդգծել են, որ ռուս սահմանապահները խնդիրներ չեն ստեղծում, իսկ Էստոնիայից Ռուսաստան կատարած ուղևորությունների հիմնական նպատակը հանգիստն ու ավելի մատչելի գնով ապրանքների գնումն է։

Ավելի վաղ Էստոնիայի իշխանությունները հայտարարել էին Ռուսաստանի հետ սահմանին պաշտպանական գծի կառուցման մասին։ Տեղական լրատվամիջոցների տվյալներով՝ մինչև 2025 թվականի ավարտը նախատեսվում է կառուցել 28 բունկեր։