Գիտնականները բացահայտել են կարտոֆիլի էվոլյուցիոն ծագումը
Աշխարհ
Նոր ուսումնասիրության համաձայն՝ կարտոֆիլի ծագումը վերագրվում է 9 միլիոն տարի առաջ տեղի ունեցած բնական հիբրիդացմանը՝ վայրի լոլիկի և կարտոֆիլի նման բույսի միջև։ Հետազոտությունը, որը ներառում է 450 մշակվող և 56 վայրի կարտոֆիլի գենոմների վերլուծություն, ցույց է տվել, որ այս խաչասերման արդյունքում է ձևավորվել կարտոֆիլի հիմնական հատկանիշը՝ սննդանյութերով հարուստ ենթագետնյա պալարը։
Գիտնականները պարզել են նաև երկու առանցքային գեներ, որոնք պատասխանատու են պալարների ձևավորման համար։ Հիբրիդացումը համընկել է Անդերի արագ բարձրացման շրջանի հետ, ինչը նոր բույսին հնարավորություն է տվել հարմարվելու ցուրտ ու չոր կլիմային և տարածվելու լեռնային տարածաշրջանում։
Հետազոտությունը կարևոր է նաև կարտոֆիլի նոր սորտերի մշակման տեսանկյունից՝ կլիմայական փոփոխությունների պայմաններում։ Չինաստանի Գյուղատնտեսական գիտությունների ակադեմիայի գենոմաբան Սանվեն Հուանը նշել է, որ հնարավոր է ապագայում ստեղծել բույս, որը կտա և՛ լոլիկի պտուղ, և՛ կարտոֆիլի պալար։ Ներկայում աշխարհում կա շուրջ 5000 կարտոֆիլի տեսակ, իսկ Չինաստանը համարվում է խոշորագույն արտադրող։ Կարտոֆիլը համարվում է մարդկության սննդակարգի երրորդ ամենակարևոր բաղադրիչը՝ բրնձից և ցորենից հետո, գրում է Reuters-ը:
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
