Գերմանիայում երկաթուղում երկու օրվա ընթացքում երրորդ հրդեհն է տեղի ունեցել

Գերմանիայում երկու օրվա ընթացքում երրորդ երկաթուղային մալուխի հրդեհն է տեղի ունեցել։ Նախնական տվյալներով՝ հրդեհը կարող էին կազմակերպել ձախ ծայրահեղականները։ Այս մասին հայտնում է գերմանական երկաթուղային Deutsche Bahn ընկերությունը։

Հրդեհը տեղի է ունեցել ուրբաթ՝ օգոստոսի 1-ին, ածուխ տեղափոխելու համար օգտագործվող երկաթուղային գծի վրա։ Նախորդ հրդեհների հետևանքով՝ երկաթուղային ենթակառուցվածքին պատճառված վնասը վերացվել է՝ աշխատողները փոխարինել են հինգ մալուխ։

Հինգշաբթի և ուրբաթ օրերին երկրի արևմուտքում տեղի են ունեցել երկու հրդեհներ, որոնք կաթվածահար են արել Դույսբուրգի և Դյուսելդորֆի միջև երկաթուղու վրա գնացքների երթևեկությունը։ Պատասխանատվությունը ստանձնել է ձախ ծայրահեղական Kommando Angry Birds խմբավորումը։

Հաշվի առնելով այս փաստը՝ Գերմանիայի անվտանգության մարմինները չեն բացառում երկրի ենթակառուցվածքային օբյեկտներում հետագա դիվերսիաները։