Եվրոպան խզում է կախվածությունը ամերիկյան գիտությունից՝ կլիմայական տվյալների կորստի վտանգի պատճառով

Եվրամիությունն ու մի շարք եվրոպական երկրներ սկսել են ստեղծել անկախ գիտական տվյալների հավաքագրման համակարգեր՝ ԱՄՆ-ից ունեցած կախվածությունը նվազեցնելու նպատակով։ Այս քայլն ընդունվել է այն բանից հետո, երբ Դոնալդ Թրամփի վարչակազմը կրճատեց կարևոր գերատեսչությունների՝ մասնավորապես NOAA-ի և կլիմայական այլ կառույցների ֆինանսավորումը, ինչի հետևանքով բազմաթիվ տվյալաշտեմներ դուրս են բերվում հասանելիությունից։

ԵՄ-ն մտահոգված է՝ առանց ամերիկյան տվյալների կդժվարանան կանխատեսել կլիմայական ծայրահեղ երևույթներ և իրականացնել ենթակառուցվածքային ներդրումներ։ ԵՄ պաշտոնյաներն այժմ ընդլայնում են Եվրոպական ծովային դիտարկումների ցանցը և նախատեսում են մեծացնել ֆինանսավորումը Argo ծրագրին, որը գլոբալ մակարդակով հետևում է ծովերի տաքացմանն ու ջրի մակարդակի բարձրացմանը։

Թրամփի վարչակազմը կրճատել է NOAA-ի բյուջեն 1.8 միլիարդ դոլարով և նախատեսում է փակել գլխավոր հետազոտական ստորաբաժանումը՝ դադարեցնելով տասնյակ տվյալների հավաքագրում։ Այս ֆոնին եվրոպական երկրներն արդեն սկսել են պահուստավորել ամերիկյան տվյալները՝ դրանց հնարավոր անհետացման դեպքում։ Գերմանիան, Նորվեգիան, Դանիան և մյուսները դիտարկում են անկախ գիտական ենթակառուցվածքներ ստեղծելու հեռանկարը՝ միջազգային տվյալների ապահովության նոր համակարգ ձևավորելու համար, հայտնում է Reuters-ը։