Ձկնորսները բռնել են հսկա «սատանա» սոմ՝ 170 կգ քաշով

Հնդկաստանի Օդիշա նահանգում տեղական ձկնորսները Բրամհանի գետում բռնել են հսկայական սոմ՝ 170 կիլոգրամ քաշով։ Ինչպես հաղորդում է Kalinga TV-ն, հսկա ձուկը հայտնաբերվել է Կանիխա քաղաքի մոտ։ Այն դուրս հանելու համար անհրաժեշտ է եղել չորսից հինգ մարդ։

Ձկնորսները պնդում են, որ նման որսը հնարավոր է դարձել ջրի բարձր մակարդակի շնորհիվ՝ Ռենգալի ջրամբարի փականի բացումից հետո։ Հիմա նրանք հույս ունեն, որ հնարավոր կլինի բռնել նման չափերի այլ ձկներ ևս։

Այս տեսակի սոմերը, որոնք հայտնի են որպես «սատանա» կամ «գունչ», տարածված են Հնդկաստանում, Նեպալում և Բանգլադեշում։ Դրանք կարող են հասնել 2 մետր երկարության և սնվում են հիմնականում փոքր ձկներով և խեցգետիններով։ Կան չհաստատված տեղեկություններ, ըստ որոնց՝ այս հսկաները երբեմն հարձակվում են մարդկանց վրա։ 1998-ին Հնդկաստանում և 2007-ին Նեպալում գրանցվել են դեպքեր, երբ գունչը մարդ է հափշտակել։ Տեղացիներն այս հարձակումները վերագրում են միևնույն՝ 90 կգ քաշով սոմ-մարդակեր ձկանը։