Վիննիցայում բողոքի ցույցի մասնակիցների դեմ քրեական գործ է հարուցվել

Ուկրաինական ոստիկանությունը քրեական գործ է հարուցել Վիննիցայի զինկոմիսարիատի մոտ տեղի ունեցած բողոքի ցույցի մասնակիցների դեմ։ Այս մասին հայտնել են իրավապահ մարմինների մամուլի ծառայությունից՝ նշելով, որ տեղի է ունեցել պետական կառույցի գրավման փորձ։

Ուկրաինական լրատվամիջոցների տեղեկացմամբ՝ քաղաքային «Լոկոմոտիվ» մարզադաշտում, որտեղ բերվել էր մոտ հարյուր տղամարդ՝ ենթադրաբար զինվորական ստուգման նպատակով, տեղի բնակչուհիները փորձել են ներխուժել տարածք՝ պահանջելով ազատ արձակել իրենց հարազատներին։ Նրանք կոտրել են դարպասը, սակայն ոստիկաններն ու զինկոմիսարիատի աշխատակիցները հասցրել են տղամարդկանց դուրս բերել այլ մուտքով։

Իշխանությունները հաղորդել են, որ ցուցարարների թվում եղել է մոտ 80 մարդ։ Հինգ տղամարդ արդեն ձերբակալվել է՝ 21-ից 33 տարեկան։ Նրանց մեղադրում են պետական շենքերի ապօրինի գրավման համար։ Վերջին շրջանում Ուկրաինայում լայն տարածում են գտել բռնի մոբիլիզացիայի դեպքերի մասին տեսանյութերը, որտեղ զինվորականները փողոցներում ուժով բերման են ենթարկում տղամարդկանց։