Եվրոպական հանձնաժողովը ներկայացրել է ԵՄ 2028-2034 թվականների բյուջեի նախագիծը

Եվրոպական հանձնաժողովը (ԵՀ) ներկայացրել է Եվրամիության երկարաժամկետ ֆինանսական պլանի (բյուջեի) իր առաջարկը՝ գրեթե 2 տրիլիոն եվրոյի չափով, կամ ԵՄ համախառն ազգային եկամտի միջինը 1.26%-ի չափով՝ 2028-2034 թվականների ժամանակահատվածում։

«Մեր նոր երկարաժամկետ բյուջեն կօգնի պաշտպանել եվրոպացի քաղաքացիներին, ամրապնդել Եվրոպայի սոցիալական մոդելը և ապահովել եվրոպական արդյունաբերության ծաղկումը։ Աշխարհաքաղաքական անկայունության ժամանակաշրջանում բյուջեն թույլ կտա Եվրոպային կերտել իր սեփական ճակատագիրը՝ համապատասխան իր սեփական տեսլականին և իդեալներին», - ասաց Եվրահանձնաժողովի նախագահ Ուրսուլա ֆոն դեր Լեյենը, որը չորեքշաբթի օրը Բրյուսելում ներկայացրեց Հանձնաժողովի ֆինանսական ծրագրի նախագիծը։

Եվրահանձնաժողովի առաջարկության վերաբերյալ հրապարակված մեկնաբանության մեջ ասվում է. «Եվրոպան բախվում է աճող թվով մարտահրավերների բազմաթիվ ոլորտներում, ինչպիսիք են անվտանգությունը, պաշտպանությունը, մրցունակությունը, միգրացիան, էներգետիկան և կլիմայի փոփոխության նկատմամբ դիմադրողականությունը»։