Հռոմի պապը կոչ է արել պաշտպանել Պաղեստինի խաղաղ բնակիչներին և սրբավայրերը

Հռոմի պապ Լևոն XIV-ը Պաղեստինի առաջնորդ Մահմուդ Աբբասի հետ հեռախոսազրույցում «խորը ցավ» է հայտնել Գազայի հատվածում Սուրբ Ընտանիքի կաթոլիկ եկեղեցու վրա Իսրայելի հարձակման կապակցությամբ և կոչ է արել «անհապաղ հրադադարի»։

Երկուշաբթի օրը տեղի ունեցած զրույցի ժամանակ, որի մանրամասները հաղորդել է Le Figaro թերթը՝ հղում անելով Վատիկանի հաղորդագրությանը, պապը «կրկին կոչ է արել լիովին հարգել միջազգային մարդասիրական իրավունքը՝ ընդգծելով քաղաքացիական անձանց և սուրբ վայրերը պաշտպանելու պարտականությունը, ինչպես նաև ուժի անխտիր կիրառման և բնակչության հարկադիր տեղահանման արգելքը»։

Լևոն XIV-ը նաև նշեց «հակամարտության հետևանքներից առավել տուժածներին օգնելու և մարդասիրական օգնության մատակարարումն ապահովելու հրատապությունը»։