Շվեյցարիան պատրաստակամություն է հայտնել վերանայել ԱՄՆ-ին ուղղված իր առաջարկը՝ ի պատասխան բարձր սակագների

Շվեյցարիայի կառավարությունը բաց է Միացյալ Նահանգներին ուղղված իր առաջարկը վերանայելու համար՝ ի պատասխան պլանավորվող բարձր սակագների, հայտարարել է բիզնեսի նախարար Գի Պարմելինը։ Փորձագետները զգուշացնում են, որ նախագահ Դոնալդ Թրամփի հայտարարած 39% ներմուծման մաքսատուրքերը կարող են ռեցեսիա հրահրել Շվեյցարիայում։

Շվեյցարիան ցնցվել էր ուրբաթ օրը, երբ Թրամփը երկրի նկատմամբ սահմանեց ամենաբարձր սակագներից մի քանիսը՝ իր համաշխարհային առևտրային բարեփոխումների շրջանակներում, իսկ ոլորտային ասոցիացիաները զգուշացրին, որ տասնյակ հազարավոր աշխատատեղեր վտանգի տակ կհայտնվեն։

Երկրի նախարարների կաբինետը երկուշաբթի օրը հատուկ նիստ կանցկացնի՝ քննարկելու իր հետագա քայլերը։ Պարմելինը RTS հեռուստաընկերությանը հայտնել է, որ կառավարությունը կարագացնի իր գործողությունները, նախքան օգոստոսի 7-ը ԱՄՆ-ում սակագների ուժի մեջ մտնելը։

«Մենք պետք է լիովին հասկանանք, թե ինչ է տեղի ունեցել, ինչու է ԱՄՆ նախագահը նման որոշում կայացրել։ Երբ մենք դա քննարկենք, կկարողանանք որոշել, թե ինչպես վարվել հետագայում։ Ժամկետները սեղմ են, հնարավոր է՝ դժվար լինի ինչ-որ բանի հասնել մինչև 7-ը, բայց մենք կանենք հնարավոր ամեն ինչ՝ բարի կամք դրսևորելու և մեր առաջարկը վերանայելու համար», - ասել է Պարմելինը։

Ըստ նրա, Թրամփն իր ուշադրությունը կենտրոնացրել է Շվեյցարիայի հետ ԱՄՆ-ի առևտրային հաշվեկշռի դեֆիցիտի վրա, որն անցյալ տարի կազմել է 38,5 միլիարդ շվեյցարական ֆրանկ (48 միլիարդ դոլար), ընդ որում, Շվեյցարիան դիտարկում էր ԱՄՆ-ից հեղուկացված բնական գազ (ՀԲԳ) գնելու հնարավորությունը։

Մեկ այլ տարբերակ կարող են լինել շվեյցարական ընկերությունների հետագա ներդրումները Միացյալ Նահանգներում, որը Շվեյցարիայի համար դեղագործական արտադրանքի, ժամացույցների և սարքավորումների իրացման խոշորագույն շուկան է։ «Նայեք Եվրամիությանը, նրանք խոստացել են ՀԲԳ գնել։ Շվեյցարիան նույնպես ՀԲԳ է ներմուծում. հնարավոր է, սա ուղիներից մեկն է։ Հնարավոր է՝ ավելի շատ ներդրումներ։ Բայց որպեսզի վստահ լինենք, որ սա բավականաչափ ամուր հիմք է բանակցությունները շարունակելու համար, մենք պետք է լիովին հասկանանք, թե ինչ է ակնկալում ԱՄՆ-ն», - ասել է նա։

Ե՛վ Պարմելինը, և՛ Շվեյցարիայի նախագահ Կարին Կելլեր-Սաթերը նույնպես պատրաստ են մեկնել Վաշինգտոն՝ բանակցությունները շարունակելու համար, եթե դա անհրաժեշտ լինի, հավելել է նա։

news.am