Ազգային կինոյի մրցանակաբաշխություն Հայաստանում

Մարտի 18-ին Երևանում հայկական կինոպատմության մեջ առաջին անգամ կանցկացվի Ազգային կինոյի մրցանակաբաշխություն:

Արդեն պատրաստ է մրցանակաբաշխության լավագույններին շնորհվող պատվավոր արձանիկը, որի հեղինակը դերասանուհի Իզաբելլա Ներսիսյանն է:

Երկու ձեռքերի ցուցամատերի և բթամատերի միացությունը պատկերող 42 սմ բարձրությամբ արձանիկի պատվանդանը մարմարից է, իսկ ձեռքերի միացությունը' բրոնզից՝ էմալապատված և ոսկեջրված: Երկու ձեռքերի այս միացությունը երկար ժամանակ կինոաշխարհում օգտագործվել է որպես միջոց՝ պատկեր փնտրելու համար:

Այն ռուսերենում կոչվում է Визир, իսկ հայերենում՝ հայակ, այդ իսկ պատճառով մրցանակն անվանվել է «Հայակ»:

Ազգային կինոյի զարգացման հիմնադրամի, Orange Արմենիա ընկերության և Հայաստանի ազգային կինոկենտրոնի նախաձեռնությամբ ստեղծված Ազգային կինոյի մրցանակաբաշխությունը հայ կինեմատոգրաֆիստների աշխատանքների ամենամյա ստեղծագործական բաց մրցույթ է:

Այն ազգային կինոարտադրությունը զարգացնելու, նոր անուններ բացահայտելու, հանդիսատեսին կինոթատրոններ վերադարձնելու, երկրի կինոգործիչներին համախմբելու, կինոարտադրության նոր նախագծերին օժանդակելու, լավագույն ավանդույթները պահպանելու համար է անցկացվելու:

Ընդհանուր առմամաբ, մրցանակաբաշխությանը ներկայացվել է 92 ֆիլմ, այդ թվում՝ 28 լիամետրաժ, 22 կարճամետրաժ, 10 անիմացիոն և 32 վավերագրական:

Մրցանակաբաշխության՝ կինոյի և մշակույթի անվանի գործիչներից կազմված ժյուրին Ազգային կինոյի մրցանակը կշնորհի երկու քվեարկության արդյունքում: Առաջին փուլում յուրաքանչյուր անվանակարգի համար ժյուրիի կողմից կընտրվեն 2-3 ֆիլմեր:

Երկրորդ փուլում կորոշվեն մրցանակակիրները: Ազգային կինոյի մրցանակաբաշխության մրցանակները կշնորհվեն 12 անվանակարգերում:

Բացի հիմնական անվանակարգերից, կշնորհվի նաև չորս հատուկ մրցանակ՝ հայկական կինոյի զարգացման գործում ունեցած ավանդի համար:

Մրցանակաբաշխության ժյուրին կազմված է 11 անդամից: Յուրաքանչյուր անվանակարգին վերաբերող որոշումը կընդունվի ձայների պարզ մեծամասնությամբ:

Քվեարկությունը գաղտնի է:

Բոլոր մրցանակակիրները կստանան մրցանակ և դիպլոմ: