Նավթի գները նվազում են․ շուկան արձագանքում է Թրամփի սպառնալիքներին և ՕՊԵԿ+ որոշումին

Brent տեսակի նավթի գինը օգոստոսի 4-ին ընկել է 69 ԱՄՆ դոլարից ցածր՝ առաջին անգամ հուլիսի 28-ից ի վեր։ Գնանկումը սկսվել է այն բանից հետո, երբ ԱՄՆ նախագահ Դոնալդ Թրամփը հայտարարել է, որ կրճատում է Մոսկվային տված ժամկետը Ուկրաինայի հարցում լուծում գտնելու համար՝ նոր վերջնաժամկետ սահմանելով օգոստոսի 8-ը։ Նավթի մեկ բարելի գինը տվյալ պահին նվազել է 1,08 տոկոսով՝ հասնելով 68,92 ԱՄՆ դոլարի։

Նավթի շուկան բացասական է արձագանքել նաև ՕՊԵԿ+ խմբի ութ երկրների որոշմանը՝ ավելացնել արդյունահանումը։ Ինչպես նշում է վերլուծաբան Լյուդմիլա Ռոկոտյանսկայան, այդ քայլը փաստացի չեղարկում է նախկինում կիրառված կամավոր կրճատումները, որոնք արվել էին համաշխարհային պահանջարկի աճի և պաշարների սակավության պատճառով։

Բացի այդ, գների վրա ազդեցություն է ունեցել նաև Հնդկաստանի վարչապետ Նարենդրա Մոդիի կոշտ դիրքորոշումը։ Bloomberg-ի հաղորդմամբ՝ Մոդին արձագանքել է Թրամփի սպառնալիքներին ներմուծման մաքսերի մասին՝ կոչ անելով հնդիկներին գնել տեղական ապրանքներ։ Միևնույն ժամանակ, Դելիի կառավարությունը նավթամթերքների ընկերություններին չի արգելել ռուսական նավթի գնումները, իսկ այդ հարցը մնում է կոմերցիոն որոշում։