Հնդկաստանը և Ֆիլիպինները համատեղ զորավարժություններ են անցկացրել Հարավչինական ծովի վիճահարույց ջրերում

Հնդկաստանն ու Ֆիլիպինները առաջին անգամ համատեղ ռազմածովային զորավարժություններ են անցկացրել Հարավչինական ծովում՝ ընդհանրական ջրերում, որոնք Պեկինը համարում է իր տարածքը։ Երկօրյա զորավարժությունը, որ մեկնարկել է կիրակի, ըստ վերլուծաբանների, կարող է սրել Չինաստանի հարաբերությունները տարածաշրջանի այս երկու պետությունների հետ։

Ֆիլիպինների շտաբի պետ Ռոմեո Բրաուներն ասել է, որ զորավարժությունները տեղի են ունեցել երկրի բացառիկ տնտեսական գոտում, և չնայած լուրջ միջադեպեր չեն գրանցվել, իրենց հետևել են «որոշ ուժեր»՝ ակնարկելով Չինաստանին։ Հնդկական կողմից մասնակցել են INS Delhi հրթիռակիր ռազմանավը, INS Shakti մատակարարման նավը և INS Kiltan կորվետը, իսկ Ֆիլիպիններից՝ երկու ֆրեգատներ, գրում է Al-Jazeera-ն:

Զորավարժությունները համընկել են Ֆիլիպինների նախագահ Ֆերդինանդ Մարկոսի հնգօրյա այցին Հնդկաստան, որի ընթացքում նա հայտնել է, որ ցանկանում է խորացնել ռազմավարական համագործակցությունը, ներառյալ՝ պաշտպանություն, դեղագործություն և գյուղատնտեսություն։ Չինաստանը իր հերթին մեղադրել է Ֆիլիպիններին «տարածաշրջանը լարելու» մեջ և հայտարարել, որ ցանկացած նման քայլ կստանա կոշտ պատասխան։

Չինաստանն ամենայն վճռականությամբ շարունակելու է «պաշտպանել իր տարածքային ամբողջականությունը»։ 2016 թ. միջազգային դատարանի որոշումը, որը Չինաստանի պահանջները ապօրինի էր ճանաչել, Պեկինը չի ընդունում։